Ahmad Matar
ചുവരെഴുത്തുകൾ (തുടർച്ച..)
അഹമദ്‌ മഥർ
അനാദരവ്‌
ഖുർആനിൽ ഞാൻ ഓതി;
"അബൂ ലഹബിന്റെ കൈകൾ നശിക്കട്ടെ,.."
വാർത്താ മാധ്യമങ്ങൾ പരസ്യം ചെയ്തു;
"മൗനം കനകമാകുന്നു."
എന്റെ ദാരിദ്ര്യത്തെ ഞാൻ സ്നേഹിച്ചു
ഞാൻ ഓതിക്കൊണ്ടേയിരുന്നു;
"അതു നശിക്കട്ടെ,
അവന്‌ അവന്റെ മുതലും
അദ്ധ്വാന ഫലവും ഒന്നും നേടിക്കൊടുത്തില്ല".
മര്യാദകുറഞ്ഞു പോയി എന്ന കാരണം പറഞ്ഞ്‌
അവരെന്റെ കണ്ഠ നാളത്തെ നാടു കടത്തി,
ഖുർആനെയും കണ്ടുകെട്ടി
കാരണം ഖുർആനാകുന്നു
എന്നെ കലാപത്തിനു പ്രേരിപ്പിച്ചത്‌.
കവിതയുടെ കവാടത്തിൽ.
കവിതയുടെ കവാടത്തിൽ ഞാൻ നിന്നു
കാവൽക്കാരൻ എന്റെ സ്വപ്നങ്ങളെ
പരിശോധിച്ചു
എന്റെ തല ഊരിവെക്കാനും
ഇനിയും വറ്റിപ്പോകാത്ത വികാരങ്ങൾ
തൂവിക്കളയാനും
അയാളെന്നോടു കല്‌പ്പിച്ചു.
ഞാനെന്റെ ചെരിപ്പുകൾ
വാതിൽപ്പടിയിൽ ഊരിവെച്ചു;
ഞാൻ പറഞ്ഞു:
ഏറ്റവും അപകടം പിടിച്ചത്‌
ഞാൻ ഊരിവെച്ചിട്ടുണ്ട്‌.
ഈ ചെരിപ്പ്‌ ചവിട്ടാനുള്ളതാണെങ്കിൽ
ഈ തല ചവിട്ടു കൊള്ളാനുള്ളതാണ്‌.
ഉണരുവാൻ
ഇന്നു പുലർച്ചെ,
ടൈംപീസ്‌ എന്നെ വിളിച്ചുണർത്തി;
എന്നിട്ടെന്നോടു പറഞ്ഞു:
"അറബിക്കുഞ്ഞേ,
ഉറങ്ങാൻ സമയമായിരിക്കുന്നു"
പ്രതിധ്വനി
ഞാൻ ഉറക്കെ വിളിച്ചു പറഞ്ഞു:
"അല്ല.."
പക്ഷേ, അതിന്റെ പ്രതിധ്വനി
മരണത്തെക്കുറിച്ചോർത്ത്‌ ഭയന്നു,
ഉടനെ അതു മാറ്റിപ്പറഞ്ഞു:
"അതെ"
നീതി
അവൻ എന്നെ ചീത്ത പറഞ്ഞു
എന്റെ മൗനം
എന്റെ ബലഹീനതയെ
പരസ്യപ്പെടുത്തുന്നു എന്ന്
അവൻ വാദിക്കുകയും ചെയ്തു.
അവൻ എന്നെ പ്രഹരിച്ചു
എന്റെ അധരം അവന്റെ കൈകളെ
പ്രഹരിച്ചതു കൊണ്ടാണതെന്ന്
അവൻ വാദിച്ചു.
അവനെന്നെ കുത്തി
എന്റെ രക്തം അവന്റെ വാൾമുനയെ
മലിനമാക്കി എന്നവൻ വാദിച്ചു.
ഞാൻ കാഴ്ച ബംഗ്ലാവിൽ പോയി
നിയമത്തെ പുറത്തെടുത്ത്‌
അതിന്റെ പൊടി തട്ടി
എന്നോട്‌ ദയവുണ്ടാകണമെന്ന് അപേക്ഷിച്ചു
പക്ഷേ അത്‌,
എന്റെ ഘാതകന്റെയടുത്തേക്ക്‌ ഓടിപ്പോയി
അയാളുടെ മുമ്പിൽ കുമ്പിടുകയാണു ചെയ്തത്‌.
* * *
എന്റെ മഷിയും രക്തവും എന്നോട്‌
ഇങ്ങനെ പറഞ്ഞു:
"ആശ്ചര്യപ്പെടേണ്ട!!
നമ്മുടെ നാട്ടിൽ നിയമം സ്വന്തമാക്കിയവന്‌
അത്‌ കൊണ്ട്‌ കളിക്കാനും അധികാരമുണ്ട്‌".
No comments :
Post a Comment